阿根廷展開衞冕世盃之旅，於南美洲區外圍賽首戰，主場迎戰厄瓜多爾。美斯繼續入選，國際米蘭拿達路馬天尼斯亦當弗，仲有今季喺曼城搶到正選嘅祖利安艾華利斯，「潘帕斯雄鷹」前線多人用到爆，而且佢哋之前5次對厄瓜多爾全部半場領先，半場主勝好路。（周五早上8時開賽）

2026世盃改制，參戰球隊加到48隊，南美洲區席位增至6個直入加一席附加賽，南美洲只係得10隊，阿根廷入決賽周可以話係十拿九穩。

美斯拿達路弗到爆

至於「潘帕斯雄鷹」絕大部分世盃功臣仍然在陣，美斯肯定係阿根廷主場球迷最想見到嘅球星，佢轉投美職國際邁亞密後，立即帶領球隊捧盃，可以話係寶刀未老。至於效力國米嘅拿達路馬天尼斯同樣弗爆，意甲開咧3場都有波入，包括兩次梅開二度，合共射入5球。而祖利安艾華利斯被改造成多功能球員，能擔任影子前鋒或進攻中場，前線又多一瓣變化。

另邊廂，厄瓜多爾今屆外圍賽起步有啲阻滯，佢哋上屆派拜朗卡斯迪路上陣涉嫌提供虛假資訊，今屆外圍賽先被扣3分，而且佢哋同阿根廷實力有一定距離，球隊近5次對阿根廷，全部半場落後，相信今仗難破魔咒，半場主勝穩開。