車路士上場聯賽對利物浦，不敵對手4:1，對手完全超班，每位球員基本上都唔能夠發揮到應有嘅能力，被人完美箝制。

先論今場波排陣，上半場大概希望可以保守啲，先守住對手一輪狂攻，結果係完全頂唔順，不論達雲紐尼斯係咪做咗柱男，破晒紀錄成為一場射中最多柱嘅男人，或者新仔干拿巴特利閃耀登場。點解會畀佢哋發揮得咁好，其中一個幾致命嘅弱點，就係兩閘，完全守唔住，抵抗唔到佢哋嘅側擊。

兩閘芝維爾及阿素迪沙斯，一個剛剛傷完復出，狀態一定未夠，一個本身都唔係純右閘，兩個人不論位置感，腳步提速，永遠都係跟唔上對手。路易斯迪亞斯每一球波都可以睇住你食，因為每一球基本上呃落底線嗰一下，佢都係捉唔到路。芝維爾果一邊經常性畀巴特利Overlap，完全負荷唔到，因為佢真係好fit，經常可以形成2打1，再加上芝維爾好多位置上，一攞到波處理得唔好，亦都唔似以往可以帶波殺出重圍，同時冇一個目標可以畀到。

中場輪轉依然唔係太夠快，安素費南迪斯和摩西斯卡斯度兩個人係中場唔多夾，兩個感覺上唔可以互補不足，好難互相配合，尤其是佢哋兩個都好想搶個波，而唔係互相去一個逼一個包，令到防線經常受到威脅。

防守依然未搵到最好嘅一個方法，可以抵擋到對方嘅攻勢，所以大敗一場唔單止係教練問題，球員質素依然都總距離冠軍差好遠。Willhappy