英超勁旅阿仙奴嘅美國之旅，周四朝早對美職明星隊打頭陣，阿仙奴今場幾乎「夫添」出戰，新兵迪格蘭賴斯、祖利安添巴將會首度上陣，實力強勁。美職明星隊過去4次面對歐洲球隊，全部都失落錦標，今仗睇好「兵工廠」可以順利贏波。（周四早上8時30分開賽）

為鬥曼聯巴塞作準備
阿仙奴上場熱身賽被紐倫堡逼和，不過今次出發美國陣容更加完整，1.05億鎊（約10.7億港元）加盟嘅迪格蘭賴斯將首度上陣，馬田奧迪加特、加比爾馬天尼利亦會復出，預計阿仙奴會派出最強陣容，希望盡快提升狀態，為之後兩場熱身硬仗對曼聯、巴塞隆拿做好準備。

美職明星隊今次由朗尼領軍，對上3年因疫情關係未有歐洲球隊嚟美國比賽，睇番美職明星隊對上4次鬥歐洲球會，成績為2和2負，而且2次打和都射輸12碼失落錦標，其中2016年對手正正就係阿仙奴，當年美職明星隊有杜奧巴、卡卡、韋拿等球星壓陣都輸1比2，今場阿仙奴有望贏波捧盃。