女子世盃C組首仗，出線大熱西班牙女足鬥哥斯達黎加女足。西班牙女足主要以皇家馬德里同巴塞隆拿兩大班霸球員組成，個人質素毋庸置疑，王牌球星佩迪拉絲克服傷患參賽，邦瑪迪同卡爾丹迪亦答應復出，「狂牛兵團」實力超班，有望半場打爆對手，1.5球半場大值博。

（Now聽630周五下午3時30分直播）

西班牙女足上屆世盃打入16強，今屆被視為爭冠球隊之一，佢哋喺C組可以話鶴立雞群，兩屆「世界足球小姐」佩迪拉絲可以借分組賽操起狀態，呢位核心人物喺熱身賽已經有入波，上仗9比0大炒越南女足證明球員狀態極佳，領隊維達亦採取搶攻戰術，往往喺比賽早段大力施壓，近8場賽事有6場半場總入球開2球或以上。

哥斯達黎加無力招架

另邊廂，哥斯達黎加女足相隔8年再戰決賽周，年初熱身賽對同樣嚟自歐洲嘅蘇格蘭同波蘭都輸波，今仗面對實力強橫嘅西班牙女足相信難以招架，隨時早段已被打爆，1.5球半場大好大機會開出。