淘汰賽踢法變保守
應屆女子歐國盃冠軍英格蘭女足，今日喺女足世界盃16強接受尼日利亞女足嘅挑戰。「女三獅」如日方中，分組賽3戰全勝可睇高一線，不過佢哋大賽經驗豐富，淘汰賽踢法會轉趨保守；尼日利亞女足靠硬淨防守晉級，3場分組賽全開半場和，值得跟進。（Now聽630周一下午3時30分直播）

英格蘭女足今屆世盃愈打愈有，即使第二場分組賽有中場主力姬拉華殊傷出，喺變陣下仍然大炒中國女足6比1，「女三獅」多點開花，成為冠軍熱門理所當然。

不過如果大家諗住呢場「英女」又大炒，可能又未必，事關佢哋大賽經驗豐富，識得留放，上年歐國盃雖然勇奪冠軍，但殺入淘汰賽後領隊威格曼戰術亦轉趨保守。英格蘭女足上年歐國盃3場分組賽入14球，但去到淘汰賽，3場波有兩場要踢到加時，呢兩場都係半場同對手打和，預料嚟到世界盃會照辦煮碗，尤其姬拉華殊開始復操，隨時上半場睇定啲先，下半場先換佢入嚟博殺。

尼日利亞夠硬淨頂到半場
尼日利亞女足今屆頻頻製造驚喜，佢哋以硬淨踢法迎敵，3場分組賽都以「4-5-1」陣式作戰，保證中場防守強度，能夠殺入淘汰賽亦證明戰術成功，對住英格蘭更加唔會谷前對攻，球隊3場分組賽全開半和，值得跟進。