今季大事增兵嘅阿仙奴，新球季第一擊主場迎戰諾定咸森林。「兵工廠」以冠軍為目標，多名新兵表現對辦，季前熱身亦操起狀態，開鑼前先贏曼城捧社區盾振軍心，今仗主場出擊必狂轟猛炸；森林陣容頭重尾輕，博3.5球入球大係最佳選擇。
（Now聽621及611周六晚7時30分直播）

阿仙奴上季爭標功虧一簣，夏天積極買人捲土重來，夏維斯、迪格蘭賴斯同祖利安添巴先後來投，3名新兵喺季前熱身賽有唔錯表現，迅速融入球隊踢法，阿仙奴近3場賽事先以5比3大破巴塞隆拿，再喺酋長盃同社區盾射贏12碼捧盃，球員狀態同士氣都有明顯提升。

「兵工廠」主場例多波入
阿仙奴喺酋長球場威力驚人，往往以凌厲進攻輾壓對手，上季19仗聯賽主場，有14次總入球開4球或以上，馬田奧迪加特、加比爾馬天尼利、布卡約沙卡、李安度杜沙特等均具備數胡能力，火力不庸置疑。不過阿仙奴近4場賽事都有失波，防守唔算好穩陣，同樣有失球危險。

另邊廂，森林上季僅僅護級成功，今季引入瑞典新星艾蘭加，配合艾禾尼爾、基斯活特、基比斯韋特等攻擊好手，進攻力有睇頭，可惜防守未有提升，巴西中堅菲臘比蒙達里奧亦告受傷，佢哋上季作客阿仙奴慘吞5蛋，今場好大機會再演入球騷。