聖保羅冇態輸到慌
聽朝南球盃8強次回合，巴甲勁旅聖保羅回師主場，火併厄瓜多爾班霸利加大學。雖然聖保羅首回合輸1比2，今仗必傾力反撲，可惜狀態曳有心無力；利加大學硬淨到暈，有力保住優勢全身而退，讓球客勝咪錯過。

（周五早上6時開賽）
聖保羅坐擁前皇馬中場占士洛迪古斯、前熱刺快翼盧卡斯莫拉等球星，但首回合作客極速落後兩粒，直到末段先靠盧卡斯莫拉追番球，最終以1比2敗走。事實上聖保羅狀態頗差，各項賽事近5仗贏得1場咁大把，近兩仗更加輸晒，除咗首回合不敵利加大學外，上仗聯賽對阿美利加明尼路又輸1比2，令人失望。

風格硬淨睇定嚟踢
另一邊廂，利加大學首回合能夠贏波搶先機，交出入波兼助攻嘅中場祖利奧絕對功不可沒，就算老將箭頭荷西古里路腳風唔順亦冇有怕。何況利加大學手握1球領先優勢，今仗你急佢唔急，只要做好防守保住勝局就掂。而且利加大學甚少輸波，其中各項賽事近8仗法定時間，取得5勝2和僅1敗，非常硬淨，無懼狀態低迷嘅聖保羅，受讓必捧讓球客勝。