朝另一場巴甲，由哥列迪巴主場鬥巴希亞，榜尾球隊哥列迪巴近5場聯賽全敗，失波數字亦非常多，球員陷入信心危機，作客嘅巴希亞正好趁機搶分護級。睇番近5次對賽巴希亞獲3勝2和，受讓可博讓球客勝。
（周五早上7時開賽）

哥列迪巴低迷難翻身
哥列迪巴今季長期低迷，21場聯賽僅3勝，近5場聯賽更加全敗共失14粒，猶如不設防。剛於7月底坐正嘅主帥高斯路斯基，已經面臨下台危機，球隊士氣極度低落，短期內難以翻身，今場仲要讓波真係得啖笑。

現時排16位嘅巴希亞，剛位處降班區之上，護級壓力非常大，好彩班球員狀態唔曳，近排頻頻執分，近7場聯賽就獲2勝3和2負，難得遇上包尾嘅哥列迪巴，呢3分應該志在必得。更何況巴希亞一直剋住哥列迪巴，兩隊近5次交鋒，巴希亞保持不敗之外，其中近3次更贏晒，有得受讓確係抵玩。