今晚英超曼城又登場，主場撲擊諾定咸森林，「藍月亮」聯賽5連勝高踞榜首，雖然周中踢畢歐聯，但呢支衞冕大軍勝在人腳充裕，球員早就習慣一周雙賽，佢哋近期入得又失得，近3仗全開4球或以上，一於吼實3.5球入球大。

（Now聽621周六晚10時直播）
曼城延續上季「三冠王」強勢，聯賽開季5連勝入14球失3球，艾寧夏蘭特攻入7球，周中歐聯分組賽開鑼又以3比1反勝貝爾格萊德紅星，祖利安艾華利斯起孖，夏蘭特同菲爾科頓都交出助攻，佢哋雖然攻力強，但近期後防都有失守情況，入球大值得重視。

森林後防擋唔住
至於諾定咸森林實力同曼城差一大截，而且近況一般，包括上仗對般尼，半場先落後情況下逼和1比1，可見後防並唔穩陣，今仗作客曼城將被迫縮後防守，但相信無法抵擋對方來犯，隨時大敗一場。