另一場歐國外J組，榜首葡萄牙主場迎戰次席嘅斯洛伐克，葡萄牙喺小組賽6戰全勝，攻入24球無失球，火力驚人，加上近6仗5次半場領先，包括上月作客照贏今場對手斯洛伐克，今仗主場出擊自然更有把握，捧半場主勝。

（周六凌晨2時45分開賽）
葡萄牙世盃後換帥再出發，新帥馬天尼斯同巨星相處融洽，38歲隊長C朗繼續獲得重用，暫時小組賽攻入5球，停賽一場後重返大軍名單，而且葡萄牙再唔係只有C朗嘅「一隊球隊」，就喺上場C朗坐波監缺陣，球隊就大炒盧森堡9比0，干卡路拉莫斯、迪亞高祖達同干卡路恩拿斯奧齊齊起孖，今場有番C朗，贏波絕無問題。

除咗前線火力猛，葡萄牙中場線亦係世界級，曼聯隊長般奴費南迪斯喺小組賽已經累積5個助攻，加上貝拿度施華、拉菲爾利亞奧等猛將源源不絕供應，經常喺上半場已經解決對手
。
上次碰頭小勝斯洛伐克
另邊廂，斯洛伐克在小組賽4勝1和1負，領先第3位嘅盧森堡3分，佢哋小組唯一敗仗，就係上月0比1輸畀葡萄牙，當時臨完上半場被攻破大門落敗，今仗仲要去到火龍球場作客，半場失守不足為奇。