今日下晝日聯盃4強次回合，浦和紅鑽返主場再鬥橫濱水手。紅鑽雖然首回合輸波，但整場形勢不落下風，加上主場演出穩定，遇上客場腳軟嘅水手，有力收復失地晉級，主勝有計。（周日下午4時開賽）

首回合水手憑安達臣盧比斯12碼建功，以1比0險勝紅鑽，終止紅鑽各項賽事近11仗不敗走勢。不過紅鑽此役有早川隼平傷出，末段有酒井宏樹被逐下，全場仍跟水手拉成均勢，表現絕對唔失禮，今返主場一定搏盡。事實上，紅鑽主場特醒，各項賽事近16仗主場未嘗敗績，單計近6仗主場亦獲得4勝2和，非常硬淨。

近４作客浦和未贏過
另邊廂，水手雖然首回合贏波，但近況頗為飄忽，各項賽事近9仗贏得4場咁大把，只得3場冇失波，後防不穩。其中水手客場表現打折扣，各項賽事近5仗作客錄2勝3負，其中4仗有失波，包括輸畀弱旅FC橫濱，表現慘不忍睹，加上近4次造訪紅鑽不勝，今仗凶多吉少。