德甲王者今晚揭盅
今晚德甲煞科日王者戰，多蒙特同拜仁慕尼黑將會分途出擊，多蒙特喺榜首領先2分，主場只要擊敗緬恩斯就可以封王，但和波嘅話就要睇拜仁作客對科隆嘅結果，如果拜仁勝出，兩隊同分將先以得失球作計算，拜仁喺得失球暫時領先多蒙特14球，所以邊支球隊封王，真係要鬥到最後。

蜜蜂兵團旺半大再追
德甲煞科日多蒙特主場迎戰緬恩斯，上輪戲劇性重登榜首嘅「蜜蜂兵團」決心十足，佢哋今仗只要贏波，就可以相隔11年後再嘗聯賽冠軍滋味，落到場會毫無保留。多蒙特主場氣勢凌人，搶攻踢法經常殺對方措手不及，隨時上半場已開殺戒，1.5球嘅半場大抵玩！

（周六晚上9時30分開賽）
多蒙特季尾大爆發，乘住拜仁慕尼黑低潮成功後來居上，依家距離冠軍只差最後一步，喺主場出擊當然唔會有任何鬆懈。多蒙特聯賽主場已獲11連勝氣勢凌人，當中有10仗能夠喺半場領先，多蒙特「黃牆」嘅驚人震懾力，唔係咁多球隊可以頂得住。

近5主場狂轟23球
「蜜蜂兵團」火力驚人，近5仗主場狂入23球，施巴斯坦賀拿、艾迪耶美、祖利安白蘭特同當耶爾馬倫等攻擊球員輪流發威，對手防不勝防。今仗為盡早鎖定關鍵3分，多蒙特會瘋狂逼搶求早開紀錄，佢哋對上11場聯賽主場，有10仗上半場開2球或以上。

緬恩斯踢緊風流波
作客嘅緬恩斯爭奪歐洲賽資格失敗，依家大踢風流波，近4場聯賽輸晒士無鬥志，4場比賽合共失13球，當中有6球係喺開波頭30分鐘內被攻入，連盡力抵抗嘅意志都冇埋，今仗面對鬥志驚人嘅多蒙特，上半場隨時已經大敗。