今晚早場蘇超獨腳戲，馬瑟韋爾主場硬撼格拉斯哥流浪，馬瑟韋爾喺聯賽已經3個多月未贏過，曳到冇朋友，格流自易帥後連場報捷，尤其聯賽客場勁搶韁，半場客勝有計。（周日晚8時開賽）

馬瑟韋爾雖然排名唔係最低，近5場更有4場打和，睇落幾硬淨，查實佢哋自從9月險勝赫斯1比0後，已經連續14場聯賽未嘗勝果，只得6和8負，見到都唔開胃。馬瑟韋爾單計主場聯賽就失咗18粒，未計今輪，係現時聯賽主場失波最多球隊，加上連場不勝信心受挫，唔好望佢哋立即反彈。

換帥後近６場全勝
相反，開季表現麻麻嘅格流，喺10月頭怒炒米高比爾，搵嚟前摩納哥教頭菲臘比基文迪接手後，逐漸有起色，各項賽事領軍15場，豪取12勝3和未輸過嘅佳績，單計近6場贏晒，重上正軌。未計今輪，格流喺打少一場下，只落後榜首些路迪兩分，重燃爭標希望，而且格流客場例搶韁，近5場聯賽作客，有4次上半場取得領先優勢，而呢4場最終都贏波，信心返晒嚟，造訪態沉嘅馬瑟韋爾，有力先發制人，半場客勝捧得過。