澳職元旦日下午上演前列大戰，第3位嘅西悉尼流浪者主場迎戰排第5嘅FC麥克阿瑟，兩隊近期走勢都唔係咁好，最大問題係防線穿晒窿，今仗好可能會以攻為守。兩支球隊近年交鋒都踢得燦爛，鬥攻踢法製造大量入波，今仗捧3.5球嘅入球大好路。(無綫myTV Super周一下午2時直播)

西悉尼流浪者上仗吞威靈頓鳳凰2蛋，近4場聯賽只得1勝，而且合共失咗8球波，狀態明顯不足。

麥克阿瑟習慣有前冇後
西悉尼流浪者防守不穩下，連表現最穩定嘅門將羅倫斯湯馬士都被澳洲徵召踢亞洲盃，今仗已經唔能夠上陣，想改善防守難上加難。好消息係塞爾維亞國腳連高域復出，有番呢位中場發電機助拳，相信可提高入球能力，以彌補後防不足。

FC麥克阿瑟早前經歷一輪4連勝，可惜之後無以為繼，近2仗都輸波兼每場失3球，不過佢哋踢法一向進取，即使喺往績上，麥克阿瑟近4次對住西悉尼錄得2和2負未贏過，但一樣唔會因為怕輸而改變進攻戰術，因此佢哋對上3次正面交鋒，總入球全開4球或以上，今仗好大機會繼續入球Show，大盤梗係要追。