今日悉尼爆發澳職王者戰，由墨爾本城同中岸水手爭冠。「墨城」連續第4年殺入總決賽，大賽經驗極之豐富，對住啱啱復興嘅中岸水手絕對秤先，主勝值得捧場！

（無綫J2周六下午5時45分直播）
「墨城」喺常規賽以超班姿態封王，拋離次席水手11分之多，全季只係輸過3場波，穩定性極高。佢哋連續4年殺入澳職總決賽，雖然過去3屆只有一次成功封王，但累積到大量寶貴經驗，上圈兩回合炒FC悉尼5比1，足見捧盃決心。

「墨城」陣容星光熠熠，尤其前線威力驚人，今季常規賽金靴得主占美麥卡倫，夥拍馬高迪利奧同馬菲歷基組成嘅三叉戟，等閒之輩難以招架，此外隊長占美遜早前宣布踢埋今場就掛靴，隊友當然想送佢一份榮休賀禮。

中岸水手對賽往績輸蝕
中岸水手自2013年後再次殺入季後賽總決賽，確實有驚喜，但球員普遍年輕，論經驗已經輸「墨城」一截。雖然水手連贏4場近況勇銳，但佢哋近年畀「墨城」食住，近6次對賽水手錄1和5負劣績，一於撐「墨城」贏波捧盃。