亞洲盃4強大戰，東道主卡塔爾硬撼伊朗，兩隊喺今屆法定時間都係4勝1和，實力不相伯仲。但衞冕嘅卡塔爾晉級之路相對容易，反而伊朗喺連場硬仗中愈戰愈勇，加上實力、經驗同往績都佔優，客勝屬心水推介。（HOY聽TV聽77台周三晚上11時直播）

3屆冠軍伊朗整體實力屬於亞洲頂尖，上屆亦係4強分子，陣中擁有泰尼米、阿斯蒙、查漢巴克殊等喺歐洲最高水平聯賽打滾嘅球星，堪稱冠軍級嘅陣容。

近6次對賽贏晒
伊朗喺8強技術性2比1擊敗冠軍大熱門日本，全場壓住對手嚟打，球員狀態極有保證。加上伊朗嘅王牌前鋒泰尼米今仗波監刑滿復出，火力更見強大，而且伊朗自上年開始已經維持極高狀態，近17場比賽取得15勝2和不敗佳績，近6次對卡塔爾亦錄得全勝，有「格食格」味道。

擁有主場之利嘅卡塔爾，上場靠互射12碼淘汰烏茲別克，球隊進攻效率頗低，尤其首席射手阿克林阿費夫被盯死後，球隊入球能力即大幅減弱，伊朗各方面都可秤先，客勝值博。