今晚意甲獨腳戲，「1哥」國際米蘭主場迎戰熱拿亞。國米踏入2024年贏到開晒巷，唔好話輸波，連個和字都唔識寫，隊長拿達路馬天尼斯腳風順到冇朋友，而且主場出擊非常搶韁，半場主勝捧得過。（Now聽638周二凌晨3時45分直播）

自從2024年開始，國米就開行Turbo係咁衝，各項賽事連贏11場，包括勇奪意超盃，以及歐聯16強首回合擊敗馬體會，單計近4場聯賽場場狂轟4粒，其中近3場都係大勝4比0。最重要係主帥施蒙尼恩沙基近幾仗不斷作出輪換，但完全冇影響球隊攻守，反映出無論正選抑或後備球員都弗到漏油，隊長拿達路馬天尼斯上仗更取得佢喺國米生涯第102球，亦係球隊史上第3位達到100球以上里程碑嘅外援，加上積分已經遠遠拋離祖雲達斯，重奪聯賽冠軍指日可待。

近6聯賽主場全半W
國米11連勝之前，就喺聯賽首循環作客今仗嘅對手熱拿亞打和1比1，熱拿亞喺主帥兼前意大利國腳基拿甸奴帶領下，依家站穩中游，但佢哋作客國米多數冇運行，近7次造訪國米全敗，不宜高估。何況國米近6場聯賽主場，全部都喺上半場取得領先優勢，今場隨時又先發制人，半場主勝有計。