星期日晚有場俄羅斯盃決賽，由卡斯洛達火併莫斯科中央陸軍。卡斯洛達踢法有前冇後，佢哋比賽入球唔會少，近6仗5次開3球或以上，莫斯科中央陸軍已經冇捧盃好耐，今次殺入決賽當然希望一嘗冠軍滋味，佢哋近期頻頻上演入球騷，近7仗6次開3球或以上，兩支進攻球隊碰頭，2.5球入球大有計。（周日晚10時開賽）

兩隊射手弗到漏
卡斯洛達今季排聯賽第6，亦係前6名當中入球第2多同失球最多球隊，攻力僅次於俄超冠軍辛尼特，但失球數字亦僅比排尾3嘅法高爾佛羅內什少兩球，可見佢哋踢法極富娛樂性，今季試過6比0炒奇姆基，又曾以3比4輸畀莫斯科斯巴達，上星期聯賽煞科戰同艾卡馬特踢成2比2，射手祖安哥度巴今季射入12球，年輕中場史柏特斯恩亦以11個助攻成為今季助攻王，係球隊爭勝重要棋子。

另邊廂，莫斯科中央陸軍曾經係俄超班霸，曾13度封王，俄盃亦贏過12次，不過對上一次捧盃要數到2016年俄超奪冠，同埋2018年俄超盃，難得今屆打入俄盃決賽，為求捧盃肯定搏甩髀，陣中首席射手費奧多查洛夫今季攻入14球，佢喺上星期煞科日大炒羅斯托夫一仗梅開二度，狀態弗到漏，今仗勢必大踢進攻足球繼續數胡，入球大穩陣。