近期再受關注嘅美職賽事，周四朝早上演FC洛杉磯主場對侯斯頓戴拿模，今場係兩軍5日內第2次交鋒，FC洛杉磯上場作客慘吞4蛋，今季聯賽第2次輸波，今仗返主場誓演復仇戰。FC洛杉磯主場一向硬淨，有望還以顏色炒返場，FC洛杉磯讓1/1.5球照捧上盤。（周四早上10時30分開賽）

主場硬淨火力猛
衞冕嘅FC洛杉磯近況睇落好曳，近5仗1和4負，不過當中有3場係盃賽，佢哋今季喺美職表現依舊穩定，踢14場聯賽只係輸過2場，而且主場成績非常突出，今季7場聯賽主場有5勝2和佳績，加蓬前鋒丹尼斯布安加同墨西哥老將卡路士韋拿威脅力強，火力值得信賴。

侯斯頓戴拿模上場意外大炒FC洛杉磯，但要留意佢哋主場特別威水，相反作客就由龍變蟲，對上4場聯賽作客1和3負，最近2場作客先後2比6慘負溫哥華白帽，以及0比3輸畀聖路易城SC，可見侯斯頓戴拿模防線去到作客就不堪一擊，今仗面對志切復仇嘅FC洛杉磯，上盤穩開。