世界盃冠軍阿根廷訪華，將於今晚8點喺北京踢國際熱身賽對澳洲，已經第7次訪華嘅球王美斯（圖）賽前接受專訪，表明已經無欲無求，唔會踢下屆世界盃決賽周，至於攞唔攞到金球獎亦無所謂。

美斯將於6月24日踏入36歲，被問到會唔會為阿根廷出戰3年後世界盃進行衞冕，佢話：「就好似我之前咁講，應該唔會參加下屆世界盃，原則上唔會再踢。」

被視為金球獎大熱
美斯被視為今年金球獎大熱人選，對於能否第8次獲此殊榮，佢就話：「我職業生涯嚟到呢個時間，個人獎項已經唔重要，如果獲得第8個金球獎，當然係好事，如果攞唔到亦無所謂。」今年金球獎將於10月30日公布，估計屬於美斯同曼城射手艾寧夏蘭特之爭。

至於阿根廷對澳洲屬於上年世界盃16強翻版，該仗阿根廷憑美斯、祖利安艾華利斯各入1球贏2比1，阿根廷今次強陣出擊，加上近6仗有5次上半場領先，可直取半場主勝。（無綫myTV聽SUPER周四晚8時直播）