國際賽期間，美職繼續有波踢，周日朝早將會上演肯薩斯體育會主場迎戰FC洛杉磯，「肯體會」狀態勇猛，近4仗獲得3勝1和，主場出擊更加錄得4連勝。反觀上季常規賽兼季後賽盟主FC洛杉磯走下坡，近6仗僅1和5負，所謂寧捧當頭起，撐肯薩斯體育會主勝。

（周日早上8時30分開賽）

肯薩斯體育會季初表現差，導致失咗大量分數，但由5月開始愈戰愈勇，近4場聯賽贏3場，另外1場屬於作客領先之下，戰至88分鐘被判罰12碼，先至被溫哥華白帽逼和1比1，的確唔抵，以肯體會近4場主場全勝，合共轟入13球嘅走勢，要攻陷FC洛杉磯防線，並唔困難。特別係前鋒阿倫佩列度腳風非常順，近2仗射入3球及1次助攻，有佢在陣，肯薩斯體育會贏面相當大。

FC洛杉磯3線作戰跌Watt
相比之下，FC洛杉磯每況愈下，皆因球隊三線作戰，令球員疲於奔命，包括美聯盃、聯賽及中冠盃賽事在內，近6仗錄得1和5負差劣成績，即使單計美職，亦連輸兩場兼冇波入，包括作客吞侯斯頓戴拿模4蛋，今仗造訪肯薩斯體育會，恐怕凶多吉少。