英超尾場由曼城將會作客護級嘅諾定咸森林。「藍月亮」上輪大炒白禮頓4蛋，追到僅落後阿仙奴1分但踢少1場，仍然掌握爭標主動權，球隊已開啟「爭標模式」，要贏森林只係基本任務，佢哋近3次對森林全部半場領先，再追半場客勝啱數。（Now聽621周日晚11時30分直播）

難擋藍月留力護級戰
曼城全力爭冠，今場遇弱旅3分志在必得，為免夜長夢多勢必在初段展開強攻，務求盡早取得領先優勢，上場贏白禮頓，上半場已攻入3粒，隊員為贏波，將會瞓身搶攻冇保留。

諾定咸森林上場對愛華頓嘅護級關鍵戰淨吞兩蛋，士氣受打擊，森林現時僅比排尾3嘅盧頓多1分，形勢岌岌可危。不過睇番森林最後4輪賽程，其中兩場係對錫菲聯同般尼，呢兩場先係護級關鍵，所以今場鬥曼城或抱住「唔夠打就算」嘅心態，留力下場對錫菲聯，再全力搏殺都唔奇，曼城半場領先機會更高。