朝國際熱身賽，阿根廷喺美國中立場鬥厄瓜多爾，為美洲盃進行檢閱。阿根廷贏得世盃後走勢堅挺，錄11勝1負佳績，主帥史卡朗尼今次點兵精銳盡出，加上阿根廷近6次對賽5勝1和，厄瓜多爾離開高原走晒樣，讓球主勝屬信心之選。（周一早上7時開賽）

美斯歸隊唔可以失威
美斯喺今年3月因傷缺席兩場熱身賽，但阿根廷仍然輕取薩爾瓦多同哥斯達黎加，兩場都入3粒，今場係呢位阿根廷球王今年首場國際賽，喺美國舉行對效力國際邁亞密嘅美斯嚟講，等同半個主場，集多項有利條件於一身，阿根廷可謂不勝無歸。由於今場目的為美洲盃熱身，史卡朗尼預計會盡遣強陣，務求大勝一場為美洲盃壯聲威。

厄瓜多爾近年雖有進步演出，不過佢哋向來靠高原主場搵食，舊年3次主場錄2勝1和，包括贏過烏拉圭同智利，但落番「平地」就冇乜優勢，佢哋今屆世盃外暫時唯一敗仗，就係0比1不敵阿根廷，早前熱身賽對意大利亦淨吞兩蛋，明顯遇強即屈，今場隨時大敗而回。