今日日職焦點賽事，落後榜首橫濱水手3分但踢少1場嘅神戶勝利船，主場鬥北海道札幌岡薩多。勝利船除咗要向冠軍進發外，今場亦係恩尼斯達告別戰，一班隊友自然識做，爭取入波向「小白」道別，遇上火力一樣咁猛嘅岡薩多，4.5球入球大值得捧場。（周六晚6時開賽）

勝利船今季重拾勁旅本色，上輪作客3比0大炒福岡黃蜂，前鋒武藤嘉紀延續火熱狀態，近3場聯賽轟入4粒，拍住隊中首席射手大迫勇也，呢對拍檔係勝利船今季爭標最大動力，入球能力極有保證。加上今場係恩尼斯達喺日本嘅告別戰，預計主隊一開波就會狂轟猛炸，盡早拋開比數再畀恩尼斯達上陣同球迷告別。

客軍踢法有前冇後

勝利船主場相當進取，近5仗聯賽主場至少攻入2球，其實作客嘅北海道札幌岡薩多火力更加驚人，入波仲多過榜首橫濱水手，近6場聯賽作客狂轟18粒，5次總入球開5球或以上，認真有前冇後。既然4.5球大盤有3.45倍分頭，值得一試。