另一場Ｕ21歐國盃8強，法國Ｕ21大戰烏克蘭Ｕ21，傳統勁旅法國Ｕ21今屆強陣出擊，表現非常出色，踢3場分組賽獲得全勝，以小組首名出線，盡顯爭標決心。反觀烏克蘭Ｕ21整體人腳質素平庸，唯一球星梅迪歷狀態不足，仍然未曾上陣，對球隊幫助不大，難阻法國Ｕ21贏波晉級。（Now 630周一凌晨3時直播）

法國屬於青訓強國，近年人才輩出，現時Ｕ21陣容擁有唔少已打出名堂嘅猛將，包括屬於大國腳嘅中場卡夫蘭杜林，呢位新星屬於名將之後，爸爸係法國名宿杜林，佢有老竇優良遺傳，迅速冒起，獲得利物浦等多間大球會垂青。

防線上有效力AC米蘭嘅後衞皮爾卡魯魯助陣，加上前鋒巴高拿腳風順，今屆上陣3場入2球，法國Ｕ21前中後三線實力平均。法國7個入球分別由6位球員射入，可見進攻多元化，令對手防不勝防。

梅迪歷無態靠唔住
另邊廂，烏克蘭Ｕ21喺分組賽3戰取得2勝1和，以小組次名出線，過程並唔輕鬆，其中羅馬尼亞Ｕ21一役，要靠對手擺烏龍先至險勝1比0，整體表現一般。呢支東歐球隊雖然徵召車路士貴價翼鋒梅迪歷，但佢一直未有披甲，似乎身體狀態出現問題。事實上，梅迪歷效力車仔期間表現令人失望，就算今場上陣，恐怕幫助亦唔大，烏克蘭Ｕ21遇上實力超班嘅法國Ｕ21，預料將陷入劣勢。